طاعة
كل ما عِلي صوت اللي عم ينده
بتخاف أنه ترد
كل ما حلي لون اللهب حولك
بتزيد رجفة برد
يا شوك رضيان العطش قسمة
وما كان يرضى الورد
***
زحمة شوارع عجقة حكايات
ووجوه تشبه كل حدا ما بتعرفو
وساكن مرايا بيتك الفاضي
يا ال ساكنو وحدك
مين ال زارع هالغٍرب
بين الوهم والضو
مطرح ما عينك فتّحت ت تشوف
وجاك العمى ردّك
يا لافف كتافك عباية ضيم
وعم تضحك ل مجدك
***
كل ما انرسم دربك
كل ما حدا من فوق
وطّا ورسم دربك
ورضيت تمشي فيه
بتلاقي ألف رفيق
كل ما انكتب حكيك
كل ما حدا من فوق
وطّا وكتب حكيك
وقلبك رضي تحكيه
بتغفى بحضن.. بذات الحضن بتفيق
كل ما انخلق خوفك
كل ما حدا من فوق
وطّا وخلق خوفك
وعقلك رضي تداريه
بتطّمّن وبتبل روح الريق
***
كل ما كنت انتَ
بإيدك رسمت الدرب
وقلت ال بقلبك.. وعرفت شو خوفك
بيفيض بحر بغربتك.. بوحدتك.. بوحشتك
وبتعيش تحت الموج
مغرَّب غريق
