تغيّر
متل الغريب الـ ضاع خلف بلاد
متل الحزن، لاقى حدا يغنيه بـِ بغداد
متل اللي كانوا بالقلب.. جوا القلب
وصاروا غِرب .. وبعاد
متل الحكي الـ منعاد
إنتَ
***
بعدَك كأنّك ما متت هالقد
بعدا إيديك وصوتك وريحة صباك
بعدو ع خدك ورد
بعدا المشاوير العصافير النواطير الكرِم: بيتك
وبعدا السما بتحلم
تخلق لحلمك حد
بعدك شبابيك الصبح والشوق
ولو ألف بيت انهد
بعدك حكايا مفصّلة ع قد القد
قِلتا
***
عيون الصبايا تندهك عِندا
غال القلب عطشان
ع غيبتَك: صدّا
وحواض ورد الـ تاركو دبلان
بغيبتك
ما مر غيرك يغمرو وردا
كم صوت ودّالك … تعا
معقول ما وصلك صدى؟.. معقول ما ودّا؟
يا غايب بكمشة وجع
وشي ألف إيد تشدّك وإنت إيديك مربطة بسنين
وما كنت تعرف ترجع تمدا
شو صار؟ ما بِدّا؟
خِنتا؟
***
في بال ناطر فيقتك، موعود
وفي أرض عم تحلم بليلة رجعتك
تـ تشلح البارود
وعجقة خصل هربت
وعجقة جدايل ضافرة اسمك
وسحبة شَعر مفرود
في ألف كاس وناس
في ألف صوت وعود
كل المطارح فيك
يا ولد يا مفقود
مهلك على دمّ انسكب.. ضيعان
مهلك على النسيان
مهلك على خوف السفر ع حدود
عمّرتا
