كم بيت إلها الريح؟
غِفيت منامات البلد والشوق
وفاقت مشاوير التعب
لقلوب ما فهمت حلا التلميح
طوّى الغريب لحاف كلماتو
لمّ المدى بكفّو
وخبا البلد بعيون رفقاتو
تعبان.. بس منيح..
فايق على رصيفو عم يدندن:
كم بيت إلها الريح؟
***
شو سهّرو تا فاق قبل الضو؟
وشو نيمو ع حفّة الغفوة؟
مخرمش ع وجه الليل وجه الـ راح
عازم ملامح ما بقا شافا
إلا بمنامو.. نجوم عم تضوي
خايف تجيه الشمس
وترجع معا الجفوة.
شو سهرو تا مات لون العين
وشو فيقو
تا لوّن خدودو بدمع تجريح؟
فايق على رصيفو عم يدندن:
كم بيت إلها الريح؟
***
موسم صبح
ومتل اللي خمّر شي حلم
تـَ يبلّش نهارو
غامر طريقو الخوف
مضيّع مفاتيح البلد
ومتل الـ وقع قلبو.. بزنارو
واللي غفي ع الموت
وجه الصبح.. بقهرو دفن تارو..
موسم صبح
بياع شوق يصيح يا عشاق
بياع دمع يوزّع الغصة
تجّار موت وسفر
وسمسار ياخد مِ الحكي.. وسخو
تا يبيع قصّة.. ويشتري قصّة
موسم صبح
والليل راح وما عرف هالقلب شو وجعو
صعب الحطب يفهم أغاني الشيح..
فايق على رصيفو عم يدندن
كم بيت إلها الريح؟
***
نار بقلب
وع كتاف تعّبها الحلم
حامل عباية برد
غفيان جفنو.. والقلب سهران
ينطر مشاتل ورد
محسود ع طعم الصبر
ال عرّش على ضراسو
مسروق من أرض القهر
دبّاح وسواسو
بلادو على صهلة مِهر
وقت الـ وصل: داسو
موعود يضحك والعزا
أوفى من العرس الوعد
علقان بين الوقت والنطرة
لا كان يمشي متل كل الغيم
ولا يوم شرّش متل شي شجرة
مخنوق من أيام ال مبارح
وبيموت من خوفه
كل ما لمح بكرا
محبوس بالأرض الوسيعة الضيقة
وباب الوطن في ألف قفل وقفل
بيزيح حزن الشوق من قلبو
وهالباب ما بيزيح
فايق على رصيفو عم يدندن:
كم بيت إلها الريح؟
***
دوّر ع كتفِك ما لقى
جرّب ع خصلة يصبّح.. ويبدا الشقا
ما حاش غير البردْ
غصّ وزِعل.. حنّ وعفا
جفّل عصافير الغفا
بسهلين: سهد وبُعد.
يا ريت هالليل الـ مضى ناطر
إن كان عاجز يجبر الخاطر
ضمّو على رصيف الوقت
تركو تحت خطوات
بيمحي الوقت.. شاطر
يا ريت هالنطرة غضب
تخرمش سما الصابر
تهدّ الشمس تجريح..
فايق على رصيفو عم يدندن
كم بيت إلها الريح…
