Logo Weiter Schreiben
Menu
Suche
Weiter Schreiben ist ein Projekt
von WIR MACHEN DAS
Logo Weiter Schreiben
Menu

تِقِيل العرق

Fady Jomar
Photo: Hosam Katan

تِقِيل العَرَق
ما عاد عنَّا مَي؟
عطشان يا ابن الوجع
يالـ جَابْنِي عَ نَفِسْ هَالدِنيا
عطشَانْلَك يا خي..
***
تِقِيل العَرَق
كَاسَك..
مِشتَاق تِجْمَعنَا بَعَدْ سَكرَة
نَلمْلِم حَكايا نِروح للآخِر
نَضَبْضِبْ شَنَاتِي السَفَر
وعَ الولدِنِة نِهَاجِر
نِضْحَكْ عَلى بِكرا
نِغمِّق أسَامِينا بِدفَاتِر ضَايْعَة
ونِسِرق وَقِت.. كَافِر
***
تِقِيل العَرَق
كَاسَك

شِو قُولتَك؟
بِنرجَع صِحَاب صِغَار؟
نِلعَب عَ حِيطان الحبِس بالبيت
وَنِكْبَر سَوا ونِغِار؟
شو قُولتَك؟ لِسَّا بِتجي إيّام تـَ نعيشا؟
ونصدق الجنة
ونخاف من شي نار؟
تِقِيل العرق..
كاسك
ختيرت إنتَ وتِعبِتْ مِتلي؟
بَعدك حِلو خيّ
بَعدِو الكِحل يللي ورِتْنَاه برمش، عِندَك..
بَعدَا كِتافَك واقِفة
وفي هيك.. لمِعِة وَرِدْ عَ خَدّك
ختيرت مِتلي يا ولد؟
يا حِيف كِنتْ مِفكّرَك فِوقْ الوقت
تاري الوقت.. حَدَّك..

تِقِيل العَرَق
كَاسَك..
جاي عَ بالي عَاتبَك
وحِياة ضِحكِة عين “ بو فادي “
جَاي عَ بَالي عَاتبَك..
وَما في عَتَب .. هَالورد ما بينعَاب
مَالِي حَدَا غِيرَك
احكيلو عَن تَعبي
لَولاك.. كَان الحَكي .. مَع صَاحبِو بِغيَاب
لَولَاك .. مَا كَان بِقيتْ هَايجِة هَالرِيح بِصدرِي
ومِن دهِر سَكَّرنَا بِوشَّا الباب
لَولا مَا انِك سَنَدْ.. كِنتْ وِقِعِتْ .. وِارتِحتْ
وطَابْ الفَنَى.. شِو طِابْ..

صِرنا .. مِتل مَا كَان بَيّ يخاف:
كِل واحِد بمطرح
وبنلتقى؟ ما بنلتقى؟
مين الـ بِرِجع عِمر.. غفِلة راح..
تِغيّر علينا العرَق يا خَيّ
والبدَن.. والأرواح
لما بنبكِي.. ما نِعدّ دموع
ولما بِنسكَر عَ العدد القداح.

– Wie viele Häuser hat der Wind?Lesenكم بيت إلها الريح؟
– Lieder der KälteLesenأغاني البرد
– Er hat sich verändertLesenتغيّر