ናብ ሲሃም...

ይዋእ ዕሸለየ ዋና ጻዕዳ ልቢ
ዓመትኪዶ ኮይኑ ሕማቕ ካብ ትረኽቢ፧
እንታይ ትብሊ’ለኺ እንታይከ ትሓስቢ፧
ንብዓትዶ ትቖርሲ ካብ ዓርቢ ናብ ዓርቢ፧

“ካብ…”ዶ ስኢንክሉ’ዚ መልእኽቲ፧
ካብ መቕረብ ኣይኮነን ካብ ፈተወቲ
ካብ ጋሻኺ ኣይኮነን ካብ በጻሕቲ፡
መሻግርትኺ’የ ናይቲ ዘለኺዮ
ሰላምታይ ይብጻሕኪ ክንዲ ‚ኮሎክዮ’

ደሓንዶ’ለኺኸ ከመይ ትህልዊ
እንታይ ርኢኺ አብኡ ካብ ትኣትዊ፧

አስካሕኪሑኪዶ ናብራ አብቲ ጸልማት
ፍልልይ ዘይብሉ ቋሕታ ምስ ምዕማት
ብተስፋ ጥራሕ’ዩ ዝፍለ ካብ ሙማት!

እስከ በሊ!
እንታይ በዲለዶ ትብሊ፧
ወሪዱኪ እንታይ ክትብድሊ!
“ተረካቢ ’ዓድዮ” ደኣ ኮይኑ!
ክንዲ ትጻወቲ ምስ መዛኑ
ክንዲ ትምሃሪ ምስ መዛኑ
እቲ እከይ ኣውዲቑልኪ ዓይኑ።

ሕነ ውጽዓይ ፍዳ ዘለኽዎ
ኣብ ኣቦኺ’ኳ እንተ ደለኽዎ፡
“ከምኡ’ያ ዓለም”ሲ ነይብለኪ
መስክነይቲ ኣብ ምንታይ ውዒልኪ!

ጓል ኣቦኺ ምዃን’ኳ ይትረፍኪ
ጓል እዝጊ ኢኺ’ሞ ባዕሉ የርህወልኪ፡
ኣንቲ ዕሸል ወልዶ ሸዊት ብርስን
ጅሆ ናይ በዳሊ ምዃንኪ እሕዝን!!

ይርጋኣለም ፍስሃ‚ 2013