Logo Weiter Schreiben
Menu
Suche
Weiter Schreiben ist ein Projekt
von WIR MACHEN DAS
und dem Gunda-Werner-Institut
in der Heinrich Böll Stiftung
Logo Weiter Schreiben
Menu
Hören

Koffer, gelesen von
Annika Reich

الشناتي

Fady Jomar
Title: Memory Reunion ; Mixed Media on Canvas; Original size: 97 cm x 130 cm Artist: Ala ´Hamameh 2016

أَصِل الشناتي كِفُوف ما بِتْسَاع
وِكتَاف ما قِدْرِتْ عَ حَمْل الهَم
جِوّا الشناتي وجوه
ومِلح، وصِبر، وصِوَات عَمّ تِّوه
وعَجقة، وحكايا، وناس
ما عاد إلها اسم..
عَ الولدنِة:
تِبقَى الشنّاتِي إِم.
رَشْقَات زِيتْ وزَعتر.. وِخبزة
وِورَاق دَفتر فِيه كِلّ الحِلم…
وِكِلْ مَا الشنَاتي كِبرِتْ، بِنكبَر
مهما تِفَرْطَعْنَا.. بِتْحُوشنا، وبِتْلم..

أوِل وَعِي الكِسرة بِوجِه الوقت
بتِحْمِل شنَاتِينا الصَبِر
وبِنعِيش عَ وَقْتَا..
جِبال الِقهر بِتصِير كَمْش تِراب
وبِنحمِلا بشنْتَا
خِيبات أول حِب
أوّل دَرِسْ نِتعلَّمِه عَ الكِذب
خِوف البنت مِـ الشَب
حِجار الطِريق الـ غيِّرت خِطوَاتنا
كِلّا بشنَاتِينا
حَتّى الحكي اللي انِقال عَ الطِرقَات
وَوقعَاتنا عَ درِب..
كِلّ الأًسامي الـ ما انِحكِتْ
وماتِتْ خَرَس مِن كِتر ما قالولها بكّير
بِكرا بيجي وَقتا
كلّ السكاكين الغدِر
الـ غزِّت بِضوّ الروح
وبالعتِم مَرَّقتا
كِلّا سَوا.. بِتبِقى
عَ ضهِرنَا.. بِشنتَا
عِيّون الـ غِفِتْ عَ دِموعنا
عيون اللي سهَّرتَا
دمْ الشوارع يالـ نَزَف
وغَرّق أهِل وِولاد
ما بِتعرِفُن إنتَ..
خِوفَك على حالَك
عجزَك عنْ الكِلمِة بوجِه الموتْ
ذِلّ الـ سكَن سِكّين بِبالك
هربَك مِن خِيالَك
كلْ طبِع كِنتْ تِلوم عَ صِحابُو
كلّ الحدود الـ إنتَ كَسَّرتَا
كِلا سَوا
عَ ضهرنَا .. بشنتَا

نِحنا الـ هَرَبنَا
أو حَسبْنَا إِنْه رَح نِقدر
نِهربْ مِن الكِلمِة .. بِبحر سِكِوتْ
نحنا اللي خِفْنِا مِن القَبِر
معنَا شنَاتِينا .. وبِقلبْهَا التّابوت
نحنا اللي نَقّينا الفلا
تَـ نِعشقُه ونِطِير
لمَّا الشنَاتِي كِبرِتْ وتِقلِتْ
صَارِت حَبِس.. وبِيوت..

Share
– Er hat sich verändertLesenتغيّر
– Stark ist der ArrakLesenتِقِيل العرق
Fady Jomar David Wagner

Fady Jomar & David Wagner

Fady und David – sind beide Meister der Alltagsbeobachtungen. Und Reisende, wenn auch aus unterschiedlichen Gründen. Wo sind wir, wenn wir reisen?, fragt David, und Fady schreibt ein Gedicht über einen Koffer.